Hagupit ng Bagyong "Ondoy"

September 26, 2009
Sabado

Ito na yata ang pinakamalaking pinsala na naging dulot ng isang bagyo sa ating bansa partikular sa Metro Manila. Ayon sa balita ang katumbas ng 6 na oras na pag-ulan sa araw na ito ay parang ulan na natin sa loob ng isang buwan. Siguro daw ay epekto na ito ng pagbabago ng panahon na kailangan nating paghandaan: Ang sobrang pag-ulan o sobrang walang ulan.

Sa aking panonood sa telebisyon, nasaksihan ko ang paghihirap ng ating mga kababayan na naglalakad sa kalsada, mga sasakyang naistak na sa daan, mga taong stranded sa sariling bahay dahil sa sobrang taas ng baha at ang pagnanais ng ating gobyerno na tulungan ang lahat ng nangangailangan.

Alas Dos ng hapon sa araw na ito nag-umpisa ako na makatanggap ng text buhat sa kumare ko na nakatira sa Royalville Subd., Sta. Elena, Marikina City. Ayon sa kanya natatakot siya dahil umabot na sa kalsada nila ang baha. Nasa ibaba kasi ng subdibisyon nila ang bahagi ng Marikina River at umapaw na ito hanggang sa lugar nila. Sumunod na text niya humihingi na siya ng tulong dahil sobrang taas na daw ng tubig. Lilisan na sila papunta sa simbahan ng Sta. Elena para doon manatili. Subalit naiwan pa ang kapatid niya sa bahay para siguro magbantay pa sa mga gamit. Nagmamakaawa na siya na kumontak ng rescue na maaring makatulong sa kanila. Sinubukan kong kontakin ang mga hotlines na galing sa GMA7 pero lahat ay busy. Ang huling text niya sa akin ay nalubog na ang mga bahay sa subdibisyon nila dahil inabot na rin ng baha ang simbahan at pumanhik na rin sila sa 2nd flr. nito. Sana makarating ang mga rescue team sa kanila sa tamang oras. Gutom na sila, nag-iiyakan ang mga bata. Wala silang nailigtas na gamit maliban sa pera at papeles na una niyang kinuha. Ang ibang gamit at damit nila lumutang na rin sa tubig at inanod ng baha. Sa panonood ko ng balita kanina, di ko pa nakita na may report na galing sa kanila. Pati ang address nila sa Marikina ay di ko nakita sa listahan ng GMA7 na nangangailangan ng rescue. Sa kawalang magawa dahil di ko naman makontak ang mga hotlines, nagpost ako sa aking twitter account ng panawagan gayon din sa facebook. Hanggang makita ko ang facebook ng GMA at nakapagpost ako ng report doon. Sana mailigtas na silang lahat.

Sana mailigtas na rin ang mga artistang sina Jennica Garcia, Cristine Reyes at ang iba pang kasama nila. Hindi na sana dumami pa ang bilang ng mga nasawi ng bagyo. Sana ay marami ang mag-abot ng tulong para sa mga biktima at huwag sanang magsamantala ang mga taong likas na masasama.

Ayon sa Pag-asa ay humuhupa na ang bagyo at paalis na rin ito. Sana naman po huminto na ang ulan para mapabilis ang pagliligtas sa mga biktima ng pagbaha.

Bilang tulong na magagawa ko ay ang pagdadasal para sa mga tao at pagbibigay ng mga bagay tulad ng mga damit. Dadalhin ko ito bukas sa simbahan namin. Sana tumulong ang lahat! Kailangang-kailangan po ito ngayon.